Hurmatli, Abdulla Nigʻmatovich! Sizni tavallud ayyomingiz munosabati bilan O‘zbekiston shaxmat federatsiyasi jamoasi nomidan samimiy muborakbod etamiz! Yurtimiz ravnaqi, xalqimiz farovonligi yo‘lida olib borayotgan fidokorona xizmatlaringiz, yangilanish va taraqqiyot yo‘lidagi qat’iy islohotlaringiz barchamizda chuqur hurmat va e’tirof uyg‘otadi. Sadoqat, mas’uliyat, halollik va zukkolik bilan yo‘g‘rilgan rahbarlik faoliyatingiz mamlakatimizning har sohada — jumladan, sport va intellektual rivojlanish borasida ham salmoqli yutuqlarga erishishida muhim omil bo‘lmoqda. Sizning sportni, xususan, shaxmatni rivojlantirishga bo‘lgan e’tiboringiz tufayli bugun yosh avlodimiz o‘z salohiyatini namoyon eta oladigan keng imkoniyatlarga ega bo‘lmoqda. Bu esa, xalqaro maydonda ham O‘zbekiston shaxmat maktabining obro‘sini mustahkamlashga xizmat qilmoqda. 💐Sizga sihat-salomatlik, bardavom kuch-g‘ayrat, tinimsiz muvaffaqiyatlar va davlatimiz taraqqiyoti yo‘lidagi mas’uliyatli faoliyatingizda ulkan zafarlar tilaymiz! Cheksiz hurmat bilan, O‘zbekiston shaxmat federatsiyasi jamoasi!

Mamlakatning eng kuchli shaxmatchilari Urganchda to‘planadi! Erkaklar va ayollar o‘rtasida o‘tkaziladigan ushbu nufuzli musobaqada eng yaxshi natija ko‘rsatgan ishtirokchilar O‘zbekiston chempionati Oliy ligasida qatnashish imkoniyatini qo‘lga kiritadilar!

Samarqand shahri mezbonlik qilgan, mukofot jamg‘armasi 50 000 AQSH dollarini tashkil etuvchi “Women’s Chess Championship 2025” turniri yakunlandi. Dunyoning 14 davlatidan kelgan 150 nafarga yaqin ayol shaxmatchi ikki guruhda bosh sovrin uchun bahs olib bordi. So‘nggi 9-turda g‘oliblar aniqlandi. "A" guruhida bosh sovrin polshalik Alisiya Sliviskaga nasib etdi. U qora donalarda o‘ynashiga qaramay, rossiyalik Anastasiya Bondarukni mag‘lub etdi. 9 imkoniyatdan 7,5 ochko jamg‘argan Alisiya turnir chempioniga aylandi. Vatandoshi Polina Shuvalova bilan durang o‘ynagan rossiyalik Anna Shuxman 7 ochko bilan ikkinchi o‘rinni egalladi.

Ushbu musobaqada dunyoning 12 nafar kuchli shaxmatchisi ishtirok etadi. Hozirgacha 11 shaxmatchi ma’lum bo‘lib ulgurgan, so‘nggi ishtirokchi esa bugun nokaut tizimidagi musobaqada aniqlanadi. Kecha 16 xalqaro grossmeyster yagona yo‘llanma uchun bahsga kirishdi. Afsuski, saralashning birinchi bosqichidayoq yosh grossmeysterlarimiz Nodirbek Abdusattorov va Javohir Sindarov raqiblariga imkoniyatni boy berib, mukofot jamg‘armasi 660 000 AQSH dollarini tashkil etuvchi “Freestyle Chess Grand Slam Tour” turniri finaliga yo‘l ola olishmadi.

Chempionatning standart yo‘nalishi 11 turdan iborat bo‘lib, ishtirokchilarga 90 daqiqa va har yurishga 30 soniya vaqt nazorati belgilanadi. Ushbu jahon chempionatida O‘zbekiston terma jamoasining 11 nafar shaxmatchisi qatnashmoqda. O‘g‘il bolalar o‘rtasidagi 1-turda grossmeysterimiz Muhiddin Madaminov oq donalarda o‘ynagan bo‘lsa-da, hindistonlik Vedant Nagarkatt bilan durangga rozi bo‘ldi. Muhammadzohid Suyarov qora donalar bilan ispaniyalik Roberto Florinni mag‘lub etdi. Asrorjon Omonov va Miraziz Matyoqubov ham dastlabki turda g‘alaba qozonishdi.

Endilikda Nodirbek Abdusattorov, Uesli So va Aleksandr Bortnik ushbu Ukraina kibersport klubi safida o‘ynaydi. Jamoa ertaga boshlanadigan "Chessable Masters" onlayn turnirida qatnashadi. Musobaqaning mukofot jamg‘armasi 150 000 AQSH dollarini tashkil etadi. Eng yaxshi 12 nafar shaxmatchi 31-iyul – 3-avgust kunlari Ar-Riyodda o‘tadigan Esports World Cup musobaqasiga yo‘l oladi. Ushbu musobaqaning mukofot jamg‘armasi 1,5 million dollar bo‘ladi.