Мирзо Улуғбек номидаги Ўзбекистон Миллий университети профессори Юрий Буряков шахмат тарихида муҳим кашфиёт қилди. 1990 йили у Самарқанднинг қадимий қисми – Афросиёбда олиб борилган қазилмалар давомида фил суягида ишланган 7 дона шахмат ҳайкалчасини топди. Бу, ҳозиргача топилган энг тўлиқ шахмат тўплами ҳисобланади. 1996 йили япон археологлари Ўзбекистон жанубидаги қадимий Далварзинтепа ҳудудида Кушон империяси даврига оид иккита ноёб шахмат ҳайкалчасини аниқлашди. Бу эса милоддан аввалги II асрдаёқ қадимий Ўзбекистонда шахмат ўйини мавжуд бўлганини англатади.