Самарқанд шаҳри мезбонлик қилган, мукофот жамғармаси 50 000 АҚШ долларини ташкил этувчи “Women’s Chess Championship 2025” турнири якунланди. Дунёнинг 14 давлатидан келган 150 нафарга яқин аёл шахматчи икки гуруҳда бош соврин учун баҳс олиб борди. Сўнгги 9-турда ғолиблар аниқланди. "A" гуруҳида бош соврин поляк Алисия Сливискага насиб этди. У қора доналарда ўйнашига қарамай, россиялик Анастасия Бондарукни мағлуб этди. 9 имкониятдан 7,5 очко жамғарган Алисия турнир чемпионига айланди. Ватандоши Полина Шувалова билан дуранг ўйнаган россиялик Анна Шухман 7 очко билан иккинчи ўринни эгаллади.