Чемпионатнинг стандарт йўналиши 11 турдан иборат бўлиб, иштирокчиларга 90 дақиқа ва ҳар юришга 30 сония вақт назорати белгиланади. Ушбу жаҳон чемпионатида Ўзбекистон терма жамоасининг 11 нафар шахматчиси қатнашмоқда. Ўғил болалар ўртасидаги 1-турда гроссмейстеримиз Мухиддин Мадаминов оқ доналарда ўйнаган бўлса-да, ҳиндистонлик Ведант Нагаркатт билан дурангга рози бўлди. Муҳаммадзоҳид Суяров қора доналар билан испаниялик Роберто Флоринни мағлуб этди. Асроржон Омонов ва Миразиз Матёқубов ҳам дастлабки турда ғалаба қозонишди.